Beki mpya Simba: Niachieni huyo Okwi

 

Beki mpya wa timu ya Simba Donald Musot ambaye ametamba kuwa atakuwa kibo ya Emmanuel Okwi. Picha na Maktaba 

BEKI kitasa wa Simba, Donald Musoti (32) ametua jijini Dar es Salaam jana Jumatatu mchana na kutamka kuwa ana kila aina ya mbinu za kupambana na mshambuliaji mpya wa Yanga, Emmanuel Okwi, raia wa Uganda.

Musoti amesajiliwa na Simba akitokea Gor Mahia ya Kenya kwa mkataba wa miaka miwili sambamba na kipa, Ivo Mapunda, ambaye pia anatoka Gor Mahia.

Beki huyo mrefu mwenye nguvu anasifika kwa akili ya mpira na kujiamini na alikuwa nguzo ya ukuta wa Gor Mahia mbele ya Mapunda ambaye kocha wa Taifa Stars, Kim Poulsem ametamka kwamba ndiye kipa bora nchini kwa sasa.

Alitua Dar es Salaam na ndege ya Shirika la Kenya na kupata mkosi wa mabegi yake kusahaulika jijini Nairobi. Kutokana na tatizo hilo, Musoti ambaye alitakiwa kuunganisha ndege kwenda kuwafuata wenzake Zanzibar kuanza mazoezi, amelazimika kubaki Dar es Salaam hadi leo Jumanne atakapopata mabegi yake.

Akizungumza na Mwanaspoti, Musoti alisema: “Nimekuja Simba kwa lengo la kuisaidia na kubwa ni kwamba wasubiri mambo yangu uwanjani.”

Kuhusu Okwi, alisema: “Namfahamu Okwi vizuri sana, si ni yule jamaa wa Uganda au kuna mwingine? Okwi ni mchezaji mzuri lakini kwa upande wangu niko vizuri na nimejiandaa, nitapambana naye na ndiyo maana nimesajili Simba.”

Musoti ana kazi ya kuhakikisha anaondoa machungu ya mashabiki wa Simba ambao walikuwa hawana imani na safu yao ya beki ya kati na hasa sasa baada ya Okwi kusaini Yanga.

Musoti alienda mbali na kuwaambia mashabiki wa Simba akisema: “Ninachowaomba wanipe muda tu na ushirikiano ili ninayoyategemea yakamilike. Kama unavyojua, mimi ni mgeni na nimefika kwenye timu kuna wenyeji nitakutana nao ambao nahitaji kuwafahamu namna tutakavyojipanga ili mambo yaende vizuri.”

Hata hivyo, Musoti ni mara ya kwanza kucheza nje ya Kenya lakini anaamini hilo si tatizo na yuko tayari kukabiliana na changamoto za aina yote.

Akizungumzia jezi atakayoivaa kwa kipindi atakapokuwa Simba, Musoti ambaye alipokuwa na Gor Mahia alikuwa akivaa jezi namba nne, alisema: “Niko tayari kuvaa jezi yoyote nitakayopewa, ingawa binafsi napenda namba isiyozidi 16.”

Share on Google Plus

About feisal pinto

Computer Application Student, Author, Short Stories Writer, Business Proposal Writer, Presenter and Application Builder. Email feisalpinto4@gmail.com for complains and business only.