Jezi za Mbeya City ghali kuliko za Simba, Yanga

 
JEZI ya Mbeya City ndiyo ya gharama kuliko zile za wakongwe Simba na Yanga, hii ni kwa mujibu wa mauzo ya mitaani.

Ukitaka jezi halisi ya Mbeya City utalazimika kulipa zaidi ya Sh15,000 ukiwa nje ya jiji la Mbeya, kwani jijini humo inapatikana kwa gharama hiyo katika duka lao.

Kwa mujibu wa Ofisa Habari wa Mbeya City, Fred Jackson, jezi zao wanaziuza kwa bei ya Sh15,000 lakini hadi ikifika Dar es Salaam au mkoa mwingne wowote inaweza kugharimu hadi Sh25,000.

“Wapo wanaouza jezi zetu hadi Sh35,000, tumewakataza wasiuze kwa bei ya juu kiasi hicho, kwani wanawaumiza wananchi. Tuna tawi pale Ubungo Terminal (kituo cha mabasi ya mikoani cha Dar es Salaam) na huwa tunazipeleka huko,” alisema Fred.

Hata hivyo Mwanaspoti limeshuhudia jezi hizo halisi za Mbeya City zenye nembo ya timu zikiuzwa kwa Sh25,000 huku zile ambazo si halali zikiuzwa kwa Sh15,000.

Jezi za Simba, Azam na Yanga ambazo si halisi zenyewe zinauzwa kwa Sh10,000. Bado hakuna jezi halisi za Simba na Yanga zinazouzwa madukani au mitaani.

Tangu Mbeya City ilipoanza kwa kishindo Ligi Kuu Bara msimu huu ambao ndio wa kwanza kwao, jezi za timu hiyo zimegeuka dili ambapo mashabiki mbalimbali wamekuwa wakizinunua kwa wingi. Hata hivyo hali hiyo imetoa mwanya kwa wajanja kutengeneza jezi hizo na kuziuza kwa Sh15,000 zikiwa hazina nembo ya timu hiyo.

Share on Google Plus

About feisal pinto

Computer Application Student, Author, Short Stories Writer, Business Proposal Writer, Presenter and Application Builder. Email feisalpinto4@gmail.com for complains and business only.