REAL Madrid ina mpango wa kuzungumza na Manchester United inayomhitaji winga Gareth Bale kwa kuitaka ikubali kumwachia kipa David De Gea katika dili la kubadilishana nyota hao.
United imetenga kiasi cha Pauni 100 milioni kwa ajili ya kumpata Bale baada ya awali kushindwa kumpata mwanasoka huyo katika majira ya joto mwaka jana.
Sasa wababe wa Hispania wamepanga kuipa sharti United kwamba wapo tayari kumwachia Bale, lakini iwapo tu De Gea atahusishwa katika uhamisho huo.
Real inakikubali kiwango cha Dea Gea mwenye umri wa miaka 24 kwamba anafaa kuchukua nafasi ya kipa wao wa muda mrefu, Iker Casillas.
De Gea pia yupo katika harakati za kumpiku Casillas katika lango la Hispania na litakuwa jambo la sifa kwa klabu hiyo ya Bernabeu kwamba kipa bora wa Hispania anaichezea Real.
Hata hivyo jambo hilo linaonekana kuwa gumu kwa United ambayo haitaki kuachana na kipa huyo aliyefanya vizuri kwao kwa misimu mitatu na nusu sasa tangu alipowasili akitokea Atletico Madrid kwa ada ya Pauni 18 milioni.
Lakini pia kuna hisia nyingine katika klabu hiyo ya Old Trafford kuhusiana na kushindwa kumpa De Gea mkataba mpya akiwa anaingia katika miezi 18 ya mwisho ya mkataba wa sasa.
United ilikuwa inaamini ingempata Bale kabla ya mchezaji huyo mwenye umri wa miaka 25 hajajiunga na Real katika uhamisho ulioweka rekodi ya dunia wa Pauni 85 milioni.
Kama United itashindwa kumshawishi De Gea kusaini mkataba mpya katika miezi michache ijayo, itakuwa na hatari ya kumpoteza bure yatakapofika majira ya joto mwaka 2016.
0 comments :
Post a Comment