Kaseja afanya mazoezi na Twiga Stars

KIPA wa Yanga, Juma Kaseja, juziJumatatu alifanya mazoezi na makipa wa timu ya soka ya taifa ya wanawake, Twiga Stars katika Uwanja wa Karume, uliopo Ilala jijini Dar es Salaam.

Kaseja alijiunga na makipa hao mara baada ya kumalizika mazoezi ya klabu yake ya asubuhi yaliyofanyika pia uwanjani hapo kuanzia saa moja mpaka saa tatu.

Tukio la yeye kuamua kuendelea na mazoezi akiungana na makipa hao wa Twiga Stars; Fatma Omari, Maimuna Saidi na Najiath Abbas kwa kiasi kikubwa liliibua mjadala kwa mashabiki wa soka waliokuwapo uwanjani hapo.

Kocha wa makipa wa Twiga Stars, Eliutheri Mholeli, alisema Kaseja aliungana nao baada ya kuvutiwa na mazoezi aliyokuwa akiwapa makipa wake.

“Alivutiwa na tulichokuwa tunafanya, akaomba ajiunge nasi. Sikuona ubaya kwa vile haya ni mazoezi. Alichofanya pia kimewaongezea  hamasa makipa wangu, ni kutokana na uzoefu wake,” alisema Mholeli ambaye pia ni kipa wa Bandari.

Makipa hao wa Twiga Stars walionekana kumtazama kwa makini Kaseja katika kila hatua ili kujipatia uzoefu na walifanya mazoezi kwa nguvu bila kuonyesha tofauti yoyote na yeye.

Kaseja anasifika kwa kujituma mazoezini akiwa na timu tofauti katika miaka zaidi ya kumi sasa.

Share on Google Plus

About feisal pinto

Computer Application Student, Author, Short Stories Writer, Business Proposal Writer, Presenter and Application Builder. Email feisalpinto4@gmail.com for complains and business only.