Kiama,Arsenal mdomoni mwa vigogo

 
MARA kipyenga kinapulizwa, Arsenal dhidi ya Real Madrid kwenye mtoano wa Ligi ya Mabingwa Ulaya.

Hakuna ujanja, vinara hao wa Ligi Kuu England ikiwakwepa wababe hao wa Santiago Bernabeu, inaweza kuangukia kwenye midomo ya vigogo wengine hatari zaidi, PSG, Bayern Munich, Atletico Madrid au Barcelona.

Yote hayo yatafahamika leo, Jumatatu mjini Nyon, Uswisi wakati upangaji wa timu zitakazochuana kwenye hatua ya 16 bora ya Ligi ya Mabingwa Ulaya itakapofanyika.

Arsenal imeshika nafasi ya pili kwenye kundi lake, jambo linalowaweka kwenye hatari ya kukumbana na moja ya vigogo hivyo vilivyoongoza makundi yao.

Timu ambazo Arsenal inayonolewa na Mfaransa Arsene Wenger haitakumbana nazo kwenye hatua hiyo ya 16 bora ni ni Manchester United, Chelsea kwa kuwa ni za kutoka England na Borussia Dortmund kwa kuwa zilikuwa kwenye kundi moja.

Hii ni mara ya 14 kwa Arsenal kuvuka hatua ya makundi ya michuano hiyo, lakini kichapo cha Jumatano iliyopita dhidi ya SSC Napoli kimewaweka pabaya.

Baada ya michuano hiyo kufika hatua ya mtoano, akili za mashabiki wengi wa soka zinasubiri kufahamu nani atamkabili nani kwenye michuano hiyo baada ya droo yake ya makundi itakayofanyika mjini Nyon.

Timu zilizofuzu

Timu 16 zimeingia kwenye hatua ya mtoano, ambapo timu nane zilizoongoza makundi na nane nyingine zilizomaliza nafasi ya pili.

Wababe waliongoza makundi ni Manchester United, Real Madrid, Paris Saint-Germain, Bayern Munich, Chelsea, Borussia Dortmund, Atletico Madrid na Barcelona, wakati walioshika nafasi ya pili ni Bayer Leverkusen, Galatasaray, Olympiacos, Manchester City, Arsenal, Schalke 04, Zenit St Petersburg na AC Milan.

Ujerumani imeingiza timu nne sawa na England, hivyo kuna kila dalili timu hizo zikapangwa kumenyana hatua hiyo ya mtoano, huku Man City ikiwa na uhakika wa kuikwepa Bayern Munich kwenye mtoano kutokana na kupangwa kundi moja.

Timu nyingine ambazo Manuel Pellegrini na kikosi chake cha Man City inaweza kukumbana nazo ni Barcelona, Real Madrid, Atletico Madrid, PSG na Borussia Dortmund, sawa na Arsenal ambayo kwenye orodha ya timu hizo ni Dortmund tu ambazo hatamenyana nayo kwenye mtoano wa 16 bora.

Nani kupangwa na nani?

Mabingwa saba wa zamani watachuana, ikiwamo waliotinga fainali msimu uliopita na kuchapwa, Borussia Dortmund. Italia imeingiza timu moja, AC Milan baada ya klabu mbili, Juventus na Napoli kushindwa kupenya hatua ya makundi.

Wakati mechi hizo za mtoano zikisubiri hadi Februari 18/19 na Februari 25/26 mwakani licha ya droo yake kufanyika leo Jumatatu, wengi wanasubiri kutaka kujua nani atakwaana na nani kwenye hatua hiyo. Kwenye karatasi, Arsenal na Man City zinaonekana kuwa zipo kwenye mtihani mgumu wakati Chelsea na Manchester United zikitajwa kwamba zitakuwa na mchekea kwenye hatua hiyo kutokana na kuongoza makundi yao.

Kwa klabu za England, wakati Arsenal ikiwa kwenye hatari ya kukutana na Real Madrid, Paris Saint Germain, Bayern Munich, Atletico Madrid na Barcelona, Chelsea wao wanaweza kumenyana na Bayer Leverkusen, Galatasaray, Olympiakos, Zenit St Petersburg, AC Milan sawa na Manchester United, droo ambayo kwenye karatasi inaonekana kuwa nyepesi.

Kitu cha kuvutia

Jose Mourinho na kikosi chake cha Chelsea anaweza kukumbana na nyota wake wa zamani straika Didier Drogba anayekipiga Galatasaray.

Drogba, ndiye aliyeipa Chelsea taji lake la kwanza la Ligi ya Mabingwa baada ya kufunga kwa mkwaju wa penalti katika fainali dhidi ya Bayern Munich mwaka 2012. Na baada ya kuwa na Chelsea kwa miaka minane ikiwa pia kuwa chini Mourinho, Drogba anaweza kuwa mtu hatari kama atapangwa kukumbana na klabu yake hiyo ya zamani kitu ambacho kocha huyo Mreno anapenda kitokee.

Arsenal inaweza kupangwa dhidi ya Bayern Munich, iliyozima ndoto zao kwenye Ligi ya Mabingwa Ulaya msimu uliopita licha ya kikosi hicho cha Wenger kushinda 2-0 kwenye Uwanja wa Allianz Arena Machi mwaka huu.

Lakini, pia wanaweza kupangwa dhidi ya Real Madrid ambapo kitendo hicho kitamfanya nyota mpya wa Washika Bunduki hao wa London, Mesut Ozil kukutana na waajiri wake wa zamani baada ya kuwahama mwaka huu.

Kitu kingine ni Wenger kumvaa Pep Guardiola, mtu ambaye alipokuwa na kikosi cha Barcelona alimtambia mara kadhaa Mfaransa huyo. Wengi walitaka kuona Barcelona na Bayern Munich zikimenyana katika hatua hiyo ya 16, lakini sasa hilo haliwezekani kwa kuwa timu zote zilimaliza vinara kwenye makundi yao, sawa na Mourinho kwamba hatarejea Bernabeu kwenye hatua hiyo.

Vita ya mastaa watupu

Licha ya kwamba mtoano huo utakosa kushuhudia ujuzi wa mastaa kadhaa kwenye soka akiwamo Douglas Costa, Antoine Griezmann, Andrea Pirlo, Arturo Vidal, Oscar Cardozo, Mohamed Salah, Gonzalo Higuain, Jackson Martinez na Viktor Fischer, bado kuna majina makubwa ya wachezaji na vipaji vya kuvutia vitaendelea kuwamo kwenye mtoano huo wa 16 bora.

Nyota wote watatu wanaowania tuzo ya Fifa ya Mwanasoka Bora wa Mwaka (Fifa Ballon d’Or), Lionel Messi (Barcelona), Cristiano Ronaldo (Real Madrid) na Franck Ribery (Bayern Munich) watakuwamo kwenye hatua hiyo.

Wengine, Robin van Persie, Shinji Kagawa na Wayne Rooney wataiongoza Manchester United, wakati Real Madrid itakuwa pia na Gareth Bale na Isco kwenye kikosi chake, huku Galatasaray ikiwa na wakongwe Drogba na Wesley Sneijder, Paris Saint-Germain itakuwa na Zlatan Ibrahimovic na Thiago Silva, wakati Olympiakos itakuwa na fowadi wake hatari Kostas Mitroglou.

Mastaa hao pia kutakuwa na Arjen Robben (Bayern Munich), Sergio Aguero (Man City), Eden Hazard na Frank Lampard (Chelsea), Julian Draxler (Schalke), Robert Lewandowski na Marco Reus (Borussia Dortmund), Mesut Ozil (Arsenal), Diego Costa (Atletico Madrid), Neymar na Andres Iniesta (Barcelona) na Mario Balotelli na Kaka (AC Milan).

Mechi zitakavyochezwa

Kuanzia hatua ya 16 bora hadi nusu fainali, klabu zitacheza mechi mbili dhidi ya mwenzake, nyumbani na ugenini kwa sheria zilezile mechi za mtoano.

Mechi za kwanza za hatua ya mtoano ya 16 bora zitachezwa Februari 18, 19, 25 na 26, wakati za marudiano zitafanyika Machi 11, 12, 18 na 19.

Robo fainali itafanyika Aprili 1 na 2 na zile za marudiano zitafanyika Aprili 8 na 9 mwakani, wakati nusu fainali mechi za kwanza zitafanyika Aprili 22 na 23 na timu zitarudiana Aprili 29 na 30.

Fainali itakuwa mchezo mmoja tu, utakaofanyika kwenye Uwanja wa Estadio do Sport Lisboa e Benfica nchini Ureno, Jumamosi ya Mei 24 mwakani.

Share on Google Plus

About feisal pinto

Computer Application Student, Author, Short Stories Writer, Business Proposal Writer, Presenter and Application Builder. Email feisalpinto4@gmail.com for complains and business only.